Fyrrverandi eiginmaður söngkonunnar Avril Lavigne, tónlistamaðurinn Deryck Whibley, gifti sig um helgina. Nýja eiginkonan heitir Ariana Cooper og er fyrirsæta.
Whibley, sem er þekktastur fyrir að vera frontmaður í hljómsveitinni Sum 41, og Cooper gengu í það heilaga á sunnudaginn og var athöfnin lítil. „Athöfnin var róleg. Þarna var fiðluspil og afslappað andrúmsloft,“ sagði heimildamaður People.com. Eftir athöfnina skáluðu hjónin svo í óáfengan eplasíder.
Whibley er greinilega búinn að snúa blaðinu við en fyrr á þessu ári steig hann fram og greindi frá því að hann hefur glímt við alvarleg veikindi sökum of mikillar áfengisdrykkju.
Whibley og Lavigne voru gift frá árinu 2006 til 2010.