Mbl.is frumsýnir í kvöld stiklu úr þáttaröðinni Ófærð, en sýning þáttarins hefst 27. desember á þessu ári. Ófærð er viðamesta og kostnaðarsamasta þáttagerð sem hefur verið ráðist í hér á landi, en þeir verða meðal annars sýndir á öllum Norðurlöndunum, Þýskalandi, Bretlandi og í Bandaríkjunum.
Um helgina verður fyrsti þáttur þáttaraðarinnar sýndur sem lokahnútur RIFF kvikmyndahátíðarinnar, en áður voru var hann sýndur á Toronto international film festival nú í mánuðinum.
Ólafur Darri Ólafsson og Bjarne Henriksen fara með aðalhlutverkin í þáttunum sem gerast í litlu íslensku bæjarfélagi að vetri til. Íbúarnir finna lík sem rekur upp í fjöru á meðan óveður geisar og þeir eru veðurtepptir í bænum. Þættirnir eru tíu talsins og kostuðu um milljarð króna í framleiðslu. Ríkisútvarpið lét framleiða þá í samstarfi við allar norrænu ríkissjónvarpsstöðvarnar og ZDF í Þýskalandi. BBC mun sýna þættina í Bretlandi og þá hefur The Weinstein company í Bandaríkjunum keypt sýningaréttinn vestan hafs.