Þvottabjörnin sem heldur að hann sé hundur

Fyrir ári síðan féll þvottabjarnarungi úr tré og endaði hann í bakgarði Rosie Kemp á Bahamas eyjum. Unginn var aðeins mánaðargamall og vonaðist Kemp og dóttir hennar, Laura Young, að móðir þvottabjarnarins myndi koma og sækja afkvæmi sitt. 

Hún kom þó aldrei og dýraverndunarsamtök í nágrenninu gátu ekki tekið á móti unganum. Þar sem það er löglegt á Bahamas eyjum að eiga þvottabjörn sem gæludýr, ákvað fjölskyldan að ættleiða þvottabjörninn og nefndu þau hann Pumpkin. CBS segir frá þessu.

Við fallið úr trénu braut Pumpkin, sem er kvenkyns, á sér annan afturfótinn og var hún í um mánuð að jafna sig. Fjölskyldan dýrkar og dáir Pumpkin og eru þau ekki ein um það.

Tveir hundar fjölskyldunnar, Toffee og Oreo hafa myndað „fallegt“ samband við Pumpkin að sögn Young. „Pumpkin lítur á hundana sem mæður sínar,“ útskýrði hún og bætti við að stundum væri eins og Pumpkin liti á sig sem hund. „Hún virðir þá og hún elskar að kúra með þeim þegar hún er þreytt.“

En Pumpkin hefur ekki aðeins brætt hjörtu á Young heimilinu heldur einnig á Instagram. Þvottabjörninn er með 80.000 fylgjendur á samfélagsmiðlunum og er Pumpkin orðin einn af frægustu þvottabjörnum heims.

Á Instagram má sjá myndir af Pumpkin og Orego leggja sig saman, leika sér í garðinum og slaka á í sófanum.