Modern Family-stjarna sýnir kærastann

Ariel Winter, sem margir þekkja sem Alex Dunphy í gamanþáttunum Modern Family, frumsýndi á dögunum nýjan kærasta, Laurent Claude Gaudette.

Parið er yfir sig ástfangið en Gaudette segir að Winter hafi gert hosur sínar grænar fyrir honum.

„Ég fékk skilaboð frá henni. Það var í fyrsta sinn sem ég talaði við hana. Ég man að ég sendi mjög stutt skilaboð til baka og hún svaraði mér með þessari ótrúlega löngu málsgrein.“

Skötuhjúin hafa undanfarið sést saman á ýmsum viðburðum, en Gaudette fylgdi Winter til að mynda á Emmy-verðlaunahátíðina líkt og fram kemur í frétt Daily Mail.

Winter sem fyrr á árinu gekkst undir brjóstaminnkun segist vera full sjálfsöryggis eftir að hafa gengist undir aðgerðina. Að sögn þjáðist hún af miklum bakverkjum og átti erfitt með að standa upprétt sökum þrálátra verkja.

„Ég gat ekki staðið lengi upprétt. Mig verkjaði svo mikið að ég þoldi ekki sársaukann. Ég var stöðugt kvalin í hálsinum og þetta var farið að hafa áhrif á hrygginn í mér.“

 „Ég hélt að ég yrði gagnrýnd fyrir að leggjast undir hnífinn, en ég upplifði mikinn stuðning frá konum og ungum stelpum.“

Winter segir að aðgerðin hafi opnað fyrir umræðuna og að hún hafi fengið fjöldamörg skilaboð frá ungum stelpum í sömu sporum eftir að hafa lýst henni opinberlega.

• Blogga um frétt