Orðljóti stjörnukokkurinn Gordon Ramsay neyddist til að hætta keppni í þríþraut eftir að hafa ofþornað. Keppnin, sem kennd er við Járnkarlinn, fór fram á Havaí en keppendur þurfa að synda 3,8 km, hjóla 180 km og að lokum hlaupa heilt maraþon.
Daily Mail greindi frá því að Ramsay hefði þurft að leita sér læknisaðstoðar og hefði því ekki náð að ljúka keppninni. Seinna sendi sjónvarpskokkurinn frá sér orðsendingu á Facebook síðu sinni þar sem fram kom:
„Þetta hafðist ekki í ár. Á meðan hjólahlutanum stóð gat ég engu haldið niðri og kastaði nokkrum sinnum upp sem varð til þess að ég ofþornaði. Ég hélt að ég gæti harkað af mér í gegnum maraþonið en líkaminn bara slökkti á sér.“
Ramsay er ekki ókunnugur Járnkarlinum því hann tók þátt árið 2013 og lauk keppni á 14 tímum. Einnig lauk hann hálfum Járnkarli fyrr á árinu ásamt eiginkonu sinni.
Ofurkokkurinn lætur þetta ekki á sig fá og segist ætla að taka þátt síðar.
„Takk fyrir allan stuðninginn og hamingjuóskir til þeirra sem tóku þátt í ár. Ég mun snúa aftur!“