Á næsta ári stendur til að frumsýna framhald hinnar geysivinsælu kvikmyndar Zoolander. Framhaldið heitir einfaldlega Zoolander 2 og verður frumsýnt í febrúar. Samkvæmt nýjum upplýsingum mun íslenski leikarinn Ólafur Darri Ólafsson fara með hlutverk í myndinni en því er haldið fram á heimasíðu nýjustu kvikmyndar Ólafs Darra, The Last Witch Hunter. Þar má finna lýsingu á ferli Ólafs Darra og verkefnum hans, innlendum og erlendum. Þar kemur m.a. fram að Ólafur Darri muni koma fram í Zoolander 2 og gamanþáttaröð frá Netflix sem heitir Lady Dynamite. Sagt var frá þessu fyrst á Bíóvefnum.
Aðspurður í samtali við mbl.is hvort hann færi með hlutverk í Zoolander 2 sagðist Ólafur Darri einfaldlega ekki geta tjáð sig um þetta mál. Ekki er minnst á Zoolander 2 á imdb.com-síðu leikarans.