Vonbrigði ársins

Það er ekki tekið út með sældinni að vera stórstjarna í Hollywood, í það minnst ekki ef fokdýra kvikmyndin sem þú lékst í floppar algerlega í kvikmyndahúsum.

Nú hefur Forbes birt lista yfir þær kvikmyndir sem verst hefur gengið í kvikmyndahúsum á árinu. Ekki er hægt að kenna skorti á þekktum andlitum um óvinsældirnar, því flestar eru þær stjörnum prýddar.

Myndirnar sem um ræðir skarta, meðal annarra, stórleikurunum Bradley Cooper, Johny Depp, George Clooney og Bill Murray í aðalhlutverkum.

Toppinn, eða botninn - eftir hvernig á það er litið, vermir kvikmyndin Rock The Kasbah. Hún skartar stórleikaranum Bill Murray í aðalhlutverki, en á móti honum leikur Zooey Deschanel. Myndin kostaði 15 milljónir Bandaríkjadollara í framleiðslu, en hún halaði aðeins inn 2,9 milljónir dollara í kvikmyndahúsum. Þess að auki fékk hún sögulega lélega umsögn á Rotten Tomatoes, þar sem aðeins 8% notenda gefa henni lofsamlega dóma.

Í öðru sæti er gæluverkefni Sean Penns, The Gunman, sem leikarinn bæði skrifaði handrit að og framleiddi, þar að auki fer hann með aðalhlutverkið. The Gunman kostaði 40 milljónir dollara í framleiðslu. Henni gekk þó afar illa í kvikmyndahúsum, en miðar að andvirði 10,7 milljónir dollara voru seldir.

Listi Forbes er eftirfarandi:

1) Rock The Kasbah

2) The Gunman

3) Blackhat

4) Unfinished Business

5) Jem and the Holograms

6) Self/Less

7) American Ultra

8) We Are Your Friends

9) Aloha

10) Mortdecai

Kvikmynd Johnny Depps, Mortdecai, vakti ekki mikla lukku meðal áhorfenda. mbl.is/AFP

• Blogga um frétt