Í sumar fóru á kreik sögusagnir þess efnis að Daniel Craig myndi taka að sér lítið hlutverk í nýjustu Stjörnustríðsmyndinni, The Force Awakens. Sjálfur neitaði leikarinn orðrómnum staðfastlega, en nú hefur hann þó fengið byr undir báða vængi á ný.
Daily Mail hefur eftir ónefndum heimildarmanni sem starfar hjá Disney að Craig hafi tekið að sér lítið aukahlutverk í myndinni. Hann segir Craig hafa hitt leikstjórann, J.J. Abrams, í Pinewood upptökuverinu á meðan tökur á Spectre stóðu yfir.
„Þeir suðu saman dulargervið. Ég veit ekki hvaða senu um ræðir, en Daniel Craig bregður sér í hlutverk stormsveitarmanns vegna þess að þeir klæðast hjálmum og þekkjast ekki.“
Heimildamaðurinn telur líklegt að umrætt atriði sé að finna í upphafi kvikmyndarinnar, þar sem hinir hvítklæddu hermennirnir sjást ganga fylktu liði inn í þorp eitt.