Playboy-fyrirsætan Katie May er látin, 34 ára að aldri. Banamein hennar var heilablóðfall.
May hafði á ferli sínum meðal annars setið fyrir hjá tímaritunum Playboy og Sports Illustrated. Þá hafði hún getið sér gott orð á samfélagsmiðlum og meðal annars verið krýnd drottning samskiptaforritsins Snapchat af tímaritunum GQ og Sports Illustrated.
Bróðir stjörnunnar, Stephen May, sendi frá sér tilkynningu þar sem hann staðfesti fréttirnar.
„Það tekur mig sárt að staðfesta að Katie May, móðir, dóttir, systir, vinkona, kaupsýslukona, fyrirsæta og samfélagsmiðlastjarna, lést eftir að hafa fengið hörmulegt heilablóðfall á mánudaginn.“
Öndunarvél May var aftengd í gær og lést hún í faðmi fjölskyldu og vina. Hún lætur eftir sig sjö ára dóttur.
Frétt Mirror