Drottningin stal senunni
Setja bókamerki
Það er óhætt að segja að Super Bowl, eða Ofurskálin, hafi verið stjörnum prýdd í ár. Fyrir utan fótboltamennina, sem þetta á víst allt að snúast um, voru það hljómsveitin Coldplay ásamt Beyoncé og Bruno Mars sem skemmtu gestum. Áður en leikurinn hófst flutti söngkonan Lady Gaga bandaríska þjóðsönginn.
Að mati margra voru það þó aukahlutverkin, Beyoncé og Mars, sem náðu að stela senunni af Coldplay, sérstaklega Beyoncé. Coldplay átti að vera í aðalhlutverki í hálfleikssýningu leiksins milli Carolina Panthers og Denver Broncos en í gær var jafnframt fagnað 50 ára afmæli Super Bowl. Bæði Beyoncé og Bruno Mars hafa áður komið fram í hálfleik á Super Bowl, hún 2013 og hann 2014, og að mati erlendra blaðamanna juku þau orkuna á sviðinu.
Meðlimir Coldplay fengu að eiga fyrstu fimm mínútur sýningarinnar einir á sviðinu. Fluttu þeir lög eins og Viva La Vida og Paradise ásamt nýjasta lagi sínu, Adventure of a Lifetime. Þá tók Bruno Mars við ásamt dönsurum og tók smellinn Uptown Funk við mikinn fögnuð en allt ætlaði að verða vitlaust þegar Beyoncé mætti á svæðið.
Flutti hún nýjasta lagið sitt, Formation, sem hún gaf út um helgina. Lagið hefur verið stimplað sem pólitískur lofsöngur þar sem Beyoncé fagnar svartri menningu. Að mati margra álitsgjafa bandarískra fjölmiðla getur enginn annar en Beyoncé notað Super Bowl-hálfleikinn til þess að frumflytja nýtt lag og gerði hún það vel. Þar að auki tilkynnti hún einnig heljarinnar tónleikaferðalag í gærkvöldi.
Eftir flutning Beyoncé settist Martin við píanóið og sýndir voru bútar úr fyrri hálfleikssýningum. Mátti þar m.a. sjá U2, Michael Jackson og Whitney Houston. Martin söng undir m.a. ballöðuna Fix You.
Nemendur í HÍ reistu tjaldbúðir án leyfis
Telur forsendur fyrir vaxtalækkun
Vonast til að tjaldbúðir við HÍ standi áfram
Bergnuminn í Hvalfirði
Sex hafa greinst með listeríu
Frambjóðendur skila inn listum í Hörpu