Kynþokkafyllsti pabbi í heimi

Tímaritið People hefur krýnt leikarann Ryan Reynolds sem kynþokkafyllsta föður í heimi. Þetta er ekki í fyrsta skipti sem tímaritið lýsir yfir aðdáun sinni á leikaranum, enda var hann kosinn kynþokkafyllsti karlmaður heims árið 2010.

Reynolds gefur þó lítið út á kynþokkann í meðfylgjandi viðtali en talar þó fjálglega um eiginkonu sína, leikkonuna Blake Lively, og dóttur þeirra James.

„Við fórum á tvöfalt stefnumót. Hún var á stefnumóti með öðrum strák og ég á stefnumóti með annarri stelpu. Þetta var líklega vandræðalegasta stefnumót í heimi fyrir hina aðilana“ viðurkenndi Reynolds sem segist hafa fallið kylliflatur fyrir Lively á þeirri stundu.

Skötuhjúin gengu síðan í hjónaband árið 2012 og eiga saman litla dóttur.

„Ég viðurkenndi það aldrei upphátt, hvorki fyrir sjálfum mér né eiginkonu minni, en mig langaði í litla stelpu. Það er best“ játar leikarinn sem segir að sú stutta eigi ekki í neinum erfiðleikum með að vefja honum um fingur sér.

Blake Lively og Ryan Reynolds eru myndarleg hjón. AFP

• Blogga um frétt