Tónskáldið Jóhann Jóhannsson hlaut ekki Bafta verðlaunin fyrir bestu tónlistina í kvikmyndinni Sicario. Hann þurfti að lúta í lægra haldi fyrir Ennio Morricone sem samdi tónlistina fyrir kvikmyndina The Hateful Eight.
Frétt mbl.is: Jóhann tilnefndur til Bafta
Þetta er annað árið í röð sem Jóhann var tilnefndur til verðlaunanna en í fyrra var hann einnig tilnefndur til Golden Globe verðlaunanna fyrir tónlistina í kvikmyndinni The Theory Of Everything. Hlaut hann Golden Globe verðlaunin í janúar í fyrra, fyrstur Íslendinga.
Kvikmyndin The Revenant hlaut flest verðlaun í kvöld eða fimm talsins. Hún var valin besta myndin auk þess sem Alejandro González Iñárritu hlaut verðlaun fyrir bestu leikstjórnina og Leonardo Dicaprio var valinn besti leikari í aðalhlutverki.
Kvikmyndin Mad: Max Fury Road hlaut næst flest verðlaun, eða fjögur talsins, og þá flest í flokki tæknimála.
Alls voru fjórtán kvikmyndir verðlaunaðar. Kvikmyndin Carol, sem var tilnefnd til níu verðlauna, fékk engin og Bridge of Spies, sem einnig var með níu tilnefningar, hlaut aðeins ein verðlaun fyrir besta leikara í aukahlutverki.