Samband Miley Cyrus og Liam Hemsworth hefur verið mikið milli tannanna á fólki síðustu misserin, en þau virðast hafa tekið upp þráðinn að nýju eftir að hafa slitið trúlofun sinni árið 2014.
Fjölmiðlar fóru því mikinn þegar fréttist að skötuhjúin hefðu eytt áramótunum saman, auk þess sem söngkonan hefur ítrekað sést skarta trúlofunarhringnum sem Hemsworth færði henni á sínum tíma. Þá hefur hún einnig verið dugleg að deila myndum af sér, með hringinn, á samfélagsmiðlum.
Nú herma fregnir, enn á ný, að skötuhjúin séu að velta því fyrir sér að ganga í það heilaga.
Í nýjasta tölublaði tímaritsins Us Weekly er því haldið fram að söngkonan sé í óða önn að skipuleggja tilvonandi brúðkaup, og að móðir hennar taki virkan þátt í undirbúningnum.
Heimildarmaður blaðsins segir þó ekkert ákveðið, og telur skötuhjúin allt eins líkleg til að hlaupast á brott og láta pússa sig saman í Las Vegas.
Frétt Daily Mail