„Sneri mér að flöskunni“

Paul McCartney játaði í nýlegu viðtali að sér hefði reynst erfitt að hætta í Bítlunum og hann hefði í kjölfarið hugleitt að gefa tónlistina upp á bátinn.

„Ég var að segja skilið við æskuvini mína og vissi ekki hvort ég myndi halda áfram í tónlist. Ég sneri mér að flöskunni og sukkaði svolítið. Það var skemmtilegt í fyrstu, en skyndilega kárnaði gamanið. Þetta virkaði ekki. Mig langaði að byrja aftur á byrjunarreit þannig að ég stofnaði Wings,“ sagði tónlistarmaðurinn í útvarpsviðtali á dögunum.

Bítillinn fyrrverandi, sem nú er 73 ára, er hvergi nærri sestur í helgan stein. Á síðasta ári starfaði hann með Kanye West og söngkonunni Rihönnu, líkt og fram kemur í frétt Daily Mail.

„Ég elska Kanye og hann elskar mig. Hann er algert skrímsli. Hann er klikkaður gaur sem finnur upp á frábærum hlutum þannig að hann veitir mér innblástur.“

• Blogga um frétt