Íslandsför systranna Kim og Kortney Kardashian ásamt eiginmanni þeirrar fyrrnefndu, Kanye West, var frumsýnd í gærkvöldi í raunveruleikaþættinum Keeping Up with the Kardashians á sjónvarpsstöðinni E! Þættinum hefur hins vegar verið lekið á netið og hægt er að horfa á hann á Youtube.
Eins og frægt er orðið kom þríeykið hingað til lands ásamt tökuliði og aðstoðarfólki í apríl síðastliðnum, en ásamt því sem tekið var upp efni fyrir þáttinn tók West upp nýtt tónlistarmyndband hér á landi.
Á ferð sinni um landið heimsótti hópurinn Friðheima í Reykholti, Gullfoss og Geysi, Hallgrímskirkju, Bláa lónið og Bæjarins bestu svo eitthvað sé nefnt. Þá fóru þau í þyrluflug yfir landið og gistu á Hótel Rangá þar sem þau voru rekin upp úr heitum potti um miðja nótt. Í stiklu fyrir þáttinn má einmitt sjá starfsmann hótelsins tilkynna þeim að búið sé að slökkva á pottinum.
Kim, Kourtney og Jonathan Cheban, fjölskylduvinur þeirra, leyfðu aðdáendum sínum að fylgjast með hverju skrefi í gegnum samfélagsmiðilinn Snapchat. Margir hafa þó beðið eftir þættinum til að sjá nákvæmlega hvað það var sem þau höfðu fyrir stafni hér á landi.
Þátturinn er gríðarleg landkynning fyrir Ísland þar sem fjöldi fólks fylgist með öllu því sem Kardashian-systurnar taka sér fyrir hendur.