Georg Bretaprins fagnar 3 ára afmælinu

Georg Bretaprins heldur í dag upp á þriggja ára afmæli sitt. Í tilefni þess deildu foreldrar hans, þau Vilhjálmur Bretaprins og Katrín hertogaynja, þessum skemmtilegu myndum af syninum.

Í tilkynningu frá Kensingtonhöllinni segir: „Þau Vilhjálmur og Katrín vona að myndirnar af Georg muni gleðja fólk og þakka um leið fyrir allar fallegu kveðjurnar í tilefni afmælisins.“ Samkvæmt vef The Mirror mun Georg eyða afmælisdeginum á sveitasetri fjölskyldunnar.

Það var ljósmyndarinn Matt Porteous sem tók myndirnar af drengnum og sagði andrúmsloftið á heimili fjölskyldunnar afar afslappað og gott.

Á myndunum má sjá Georg leika sér í rólu og gefa hundinum Lupo ís. Hann er afar smekklega klæddur að vanda en móðir hans, Katrín, er þekkt fyrir vandaðan og fallegan stíl.