Bandaríska söngkonan Ariana Grande skaust upp á stjörnuhimininn fyrir tveimur árum og hefur síðar átt lög á toppi vinsældalistanna eins og Love Me Harder og Break Free.
Í tölvupóstum frá flokkstjórnarmeðlimum Demókrata, sem lekið var í fjölmiðla nýverið, kemur fram að til stóð að bjóða Grande að syngja á tónleikum í Hvíta húsinu. Hins vegar var hætt við að bjóða henni vegna kleinuhringjamálsins mikla. Í fyrra náðust myndir á eftirlitsmyndavélar af Grande inni í kleinuhringjaverslun þar sem hún sleikti kleinuhringi og skilaði þeim aftur á sinn stað á meðan hún sagðist hata Bandaríkin.
Sjá frétt mbl.is: Sleikti kleinuhringi og skilaði aftur
Málið vakti hörð viðbrögð og þurfti Grande að biðjast afsökunar opinberlega. Fór svo að hún var ekki ákærð fyrir atvikið.
Í tölvupóstsamskiptum stjórnarmanna í flokksstjórn Demókrata kemur fram að einn starfsmaður Demókrataflokksins hafi mælt með því að fá Grande til að syngja í Hvíta húsinu. Kleinuhringjamálið varð þó til þess að það þótti ekki fýsilegt eins og tölvupóstsamskiptin sýna.
Sjá frétt Gawker.com