Teymi söngkonunnar Christinu Grimmie, sem lést í júní á þessu ári, ætlar að gefa út fjögur áður óséð tónlistarmyndbönd á næstunni.
Grimmie var skotin til bana af andlega veikum aðdáanda þar sem hún var að árita varning eftir tónleika sína hinn 10. júní. Árásarmaðurinn svipti sig síðan lífi.
Söngkonan tók myndböndin upp í febrúar, áður en hún hóf WildFire-tónleikaferðalag sitt, líkt og kemur fram í frétt People.
„Ágúst verður tileinkaður EP-plötunni Side A, en við munum fumsýna fjögurra hluta myndbandsverk sem nefnist „The Ballad of Jessica Blue“. Christina tók þessi myndbönd upp í febrúar,“ sagði umboðsmaður söngkonunnar í færslu sem hann birti á Twitter.
„Ég gæti ekki verið stoltari af henni og öllum þátttakendum vegna þeirrar vinnu og ástar sem þau lögðu í verkefnið.“