Stjörnukokkurinn Jamie Oliver og frú eignuðust á dögunum sitt fimmta barn þegar þeim fæddist lítill drengur. Snáðinn virðist nú hafa fengið nafn, sem er harla óvenjulegt líkt og fram kemur í frétt Mirror.
Sérkennilegt nafnaval þarf þó ekki að koma neinum á óvart, enda bera eldri börnin fjögur fremur sérstæð nöfn. Elsta dóttir hjónanna heitir Poppy Honey Rosie, þá kemur Daisy Boo Pamela, þriðja dóttirin heitir Petal Blossom Rainbow en eldri sonur hjónanna heitir hins vegar Buddy Bear Maurice.
Jools, eiginkona Oliver, virðist hafa greint frá nafninu á Instagram-síðu sinni. Á myndinni stendur „Dream Big River,“ og telja því margir að snáðinn hafi verið nefndur River. Við færsluna birti hin stolta móðir síðan mynd af eldflaug og vilja margir því meina að snáðinn heiti River Rocket.
Hjónin hafa þó enn ekki staðfest neitt í þeim efnum og þegja sem gröfin.