Endurgerð Lion King í vinnslu

Walt Disney Studios hefur ráðið leikstjórann Jon Favreau til þess að leikstýra leikinni endurgerð af einni vinsælustu teiknimynd allra tíma, Konung ljónanna. Framleiðsla myndarinnar mun byggja á sama grunni og endurgerðir sígildra teiknimynda á borð við Öskubusku, Þyrnirós og Skógarlíf.

„Við getum tilkynnt um að Walt Disney Studios og leikstjórinn Jon Favreau vinna að því að vekja Konung ljónanna aftur til lífsins,“ sagði framleiðslufyrirtækið í tilkynningu en tilgreindi þó ekki hvenær myndin væri væntanleg í kvikmyndahús.

Konungur ljónanna var frumsýnd árið 1994 og er ein stærsta teiknimynd allra tíma. Myndin halaði inn rétt undir milljarði bandaríkjadala í miðasölutekjum. Myndin vann til Óskarsverðlauna fyrir lagið Can You Feel the Love Tonight eftir Elton John og Tim Rice og til tveggja Grammy-verðlauna. Hans Zimmer samdi tónlistina í myndinni.

„Verkefnið fylgir í kjölfarið á stórsmellinum Skógarlífi í leikstjórn Favreau og kom út í apríl,“ sagði enn fremur í tilkynningunni en tekjur myndarinnar á heimsvísu nema 966 milljónum dala.

Þá er von á endurgerð myndarinnar um Fríðu og dýrið á næsta ári með Emmu Watson í aðalhlutverki. Rétt eins og í þeirri mynd verða lög úr teiknimyndinni um Simba og félaga í endurgerðu myndinni.

Disney stefnir einnig að fleiri myndum um Skógaríf sem Favreau kemur einnig til með að leikstýra. Þó hefur ekki verið ákveðið hvenær framhaldsmyndirnar verða frumsýndar.

• Blogga um frétt