Ronaldo reynir fyrir sér í leiklistinni

Fótboltakappinn knái, Cristiano Ronaldo, hefur lengi lýst yfir áhuga sínum á því að færa út kvíarnar og reyna fyrir sér í leiklistinni.

Samkvæmt frétt Sky mun kappinn taka að sér hlutverk í nýjum sjónvarpsþáttum sem fjalla um sýrlenska flóttafjölskyldu. Fregnir herma að tökur hefjist í apríl næstkomandi og fari að mestu fram í Tyrklandi.

Ronaldo verður síður en svo eina stjarnan sem bregður fyrir í þáttunum, en í frétt Sky segir að Angelina Jolie muni einnig taka að sér hlutverk í þeim.

„Tökur hefjast fyrstu vikuna í apríl, en þættirnir fjalla um hlutskipti sýrlenskrar fjölskyldu á flótta. Fjölmargir leikarar, hvaðanæva úr heiminum, koma við sögu svo sem Cristiano Ronaldo og Angelina Jolie,“ er haft eftir leikstjóra þáttanna, Eyup Dirlik.

Angelina Jolie er einnig sögð munu leika í þáttunum. AFP

• Blogga um frétt