Var viss um að sér yrði nauðgað

Ræningjarnir höfðu í hótunum við starfsmann hótelsins og spurðu hann ...
Ræningjarnir höfðu í hótunum við starfsmann hótelsins og spurðu hann hvar eiginkona rapparans væri, en eiginmaður Kim er tónlistarmaðurinn Kanye West. AFP

„[Einn mannanna] límdi yfir andlitið á mér, munninn á mér, til að ég gæti ekki hrópað eða neitt og svo grípur hann í fótinn á mér og ég var ekki [...] ég var ekki í neinum fötum undir [sloppnum] og hann togaði mig að sér fremst á rúminu og ég hugsaði: Ókei, þetta er augnablikið. Þeir ætla að nauðga mér.“

Þannig rifjar raunveruleikastjarnan Kim Kardashian upp árásina og ránið sem hún varð fyrir á hótelherbergi í París í október sl. í nýjasta þætti Keeping Up with the Kardashians. Þar greinir hún frá því að hún taldi víst að sér yrði nauðgað og hún myrt.

„Ég undirbjó mig andlega og svo gerði hann það ekki og límdi fótleggina á mér saman. Síðan beindu þeir byssunni að mér og ég bara vissi að þetta væri augnablikið sem þeir myndu skjóta mig í höfuðið,“ heldur hún áfram. „Ég bara bað að Kourtney [Kardashian] myndi eiga eðlilegt líf eftir að hún sæi mig dána á rúminu.“

Í þættinum kemur fram hvernig ræningjarnir skildu Kim eftir á baðherberginu áður en þeir flúðu með skartgripi að andvirði milljóna dala, þar á meðal 20 karata demantshring sem metinn er á tæpan hálfan milljarð króna.

Sautján einstaklingar voru handteknir í tengslum við málið og tíu hafa verið ákærðir.

CNN sagði frá.

mbl.is