Sex dömur og herra

Sjö nemendur úr framhaldshópi Kramhússins í burlesque héldu sýningu á Rósenberg í síðustu viku. Að sögn Margrétar Erlu Maack, kennara hópsins, er strax farið að huga að næstu sýningum.

„Þessir nemendur eru búnir að vera hjá mér í Kramhúsinu í burlesque frá því í janúar á þremur námskeiðum. Það sem var svo skemmtilegt við þessa sýningu var hvað hún var fjölbreytt. Þetta var allt frá „Old Hollywood-glamúr“ yfir í leðurblökuatriði með pólsku þungarokki. Mjög magnaður hópur, þarna er fólk sem er að koma á svið í allra fyrsta sinn á ævinni og líka fólk sem er þaulvant á sviði. Það sem gerðist í þessum hópi var að það voru allir svo tilbúnir að gefa af sér og læra af öðrum. Það smitar alltaf út frá sér,“ segir Margrét Erla sem er sérlega stolt af sínu fólki.