Kolbrún bæjarlistamaður Akraness

Frá vinstri: Rakel Óskarsdóttir bæjarfulltrúi, Kolbrún S. Kjarval og Ingþór ...
Frá vinstri: Rakel Óskarsdóttir bæjarfulltrúi, Kolbrún S. Kjarval og Ingþór Bergmann Þórhallsson, formaður menningar- og safnanefndar. Ljósmynd/Aðsend

Kolbrún S. Kjarval er bæjarlistamaður Akraness árið 2017. Þetta kemur fram í tilkynningu frá Akraneskaupstað.

Kolbrún er fædd í Reykjavík í byrjun árs 1945 en flutti eins árs gömul til Danmerkur þar sem hún bjó til fimm ára aldurs. Til dagsins í dag hefur hún ýmist búið í Danmörku eða á Íslandi. Lengst bjó hún á Mið-Jótlandi eða í 13 ár. Hún hefur búið á Akranesi frá árinu 2008 og á eina dóttur, að því er segir í tilkynningunni.

Kolbrún hóf leirlistarnám áður en hún varð tvítug og stundaði nám á ýmsum stöðum um margra ára skeið bæði í Danmörku og á Bretlandi. Þá hefur hún jafnframt kennt leirlist í Danmörku í þrjá áratugi meðfram eigin listsköpun.

Kolbrún vinnur aðallega í leir en teikningar hennar og vatnslitamyndir bera einnig sérstæðan stíl hennar sem er undir sterkum áhrifum frá einstakri náttúru Íslands og dýralífi landsins. Fuglarnir hennar eru orðnir nokkurs konar einkennismerki Kolbrúnar en fuglaþemað teygir anga sína út í flestar hliðar listsköpunar hennar.

Kolbrún hefur haldið tíu einkasýningar og hlotið mikið lof fyrir, samkvæmt tilkynningunni.  Ein þeirra, Sköpunargleði, var haldin í Kirkjuhvoli á Akranesi árið 2012. Hún hefur einnig tekið þátt í fjölda samsýninga nú síðast í Danmörku í apríl á þessu ári og þá má einnig nefna sýninguna Afstaða – Af stað sem var sett upp í Garðalundi, skógrækt Akurnesinga, árið 2012.

Kolbrún er búsett að Kirkjubraut 48, sem margir kannast við sem Arnardal, og þar er hún einnig með vinnustofu sína. Þar hefur hún tekið á móti gestum á undanförnum árum og mun gera áfram. Vissara er þó að hringja á undan sér til að tilkynna komu sína, að því er kemur fram í tilkynningunni.

mbl.is