Ungmennaráð UN Women á Íslandi stendur fyrir styrktartónleikum á Kex Hostel í kvöld þar sem He for She-leiðtoginn og malavíski rapparinn Tay Grin kemur fram ásamt söngkonunni Hildi og rapparanum Tiny.
Með því að mæta á tónleikana gefst fólki kostur á að styrkja kaup á fjölnota dömubindum fyrir malavískar skólastúlkur en þær hafa takmarkaðan aðgang að dömubindum og öðrum hreinlætisvörum. Algengt er að stúlkur haldi sig heima við þegar þær eru á blæðingum og missa þær þess vegna eina viku úr skóla mánaðarlega sem leiðir oft til brottfalls úr námi.
Tónlistargestum verður veitt meiri innsýn í líf stúlkna í Malaví og þær áskoranir sem þær standa frammi fyrir.
Ekkert kostar inn á tónleikana en gestum er boðið að styrkja málefnið um 1.000 krónur sem jafngildir tveimur pökkum af dömubindum.
Nánari upplýsingar um tónleikana má finna hér.