Framleiðendur Game of Thrones tilkynntu í vikunni nýja þáttaröð sem gerist í Suðurríkjum Bandaríkjanna í nútíma þar sem þrælahald er enn löglegt.
Þáttaröðin, sem heitir Confederate, átti að verða næsta Game of Thrones fyrir HBO þar sem áætlað var að þetta yrði ein af vinsælustu þáttaseríum sjónvarpsstöðvarinnar.
Hins vegar hafa ummæli gagnrýnenda verið langt frá því að vera jákvæð. Margir sagn- og menningarfræðingar hafa lýst yfir því að David Benioff og D.B Weiss, báðir hvítir karlmenn á fimmtugsaldri, séu ekki réttu mennirnir til þess að túlka þrælahald í nútímanum.
Minnihlutahópum í Bandaríkjunum finnst mörgum réttindum sínum vera ógnað í nútímanum þar sem mikið kynþáttahatur hefur sprottið upp eftir áróður Donald Trump Bandaríkjaforseta. Þess vegna þykir mörgum galið að fara að búa til þáttaseríu um þrælahald í nútímanum þar sem þetta málefni er enn mjög viðkvæmt.
Enn er ekki komin dagsetning fyrir frumsýningu þáttaraðarinnar.