Höfundur sjónvarpsþáttanna The Simpsons, Matt Groening, hefur skrifað undir samning við Netflix um að gera sjónvarpsþáttaröð að nafninu Disenchantment. New York Times greinir frá þessu.
Sjónvarpsþættirnir munu gerast í konungsríki á miðöldum sem ber heitið Dreamland þar sem tröll, rostungar, álfar og nornir munu koma við sögu.
Grínleikararnir Abbi Jacobson, Eric Andre og Nat Faxon munu talsetja nokkrar persónur þáttanna ásamt Maurice LaMarche og Tress MacNeille sem hafa áður talsett fyrir The Simpsons.
Í tilkynningu sagði Groening að Disenchantment verði um líf og dauða, ást og kynlíf og hvernig skal hlæja í heimi sem er fullur af þjáningu og hálfvitum.
Tíu fyrstu þættirnir verða frumsýndir á Netflix á næsta ári.