Bandaríski leikarinn Tom Cruise braut ökkla við tökur á nýjustu kvikmynd sinni „Mission: Impossible 6.“ Tökum á kvikmyndinni hefur verið frestað á meðan að leikarinn nær sér að nýju.
Fréttastofan Reuters greindi frá því að Cruise, 55, sem þekktur er fyrir að framkvæma sín eigin áhættuatriði, hafi brotið ökklann þegar hann reyndi að stökkva milli tveggja háhýsa við tökur kvikmyndarinnar í London um helgina.
„Tom vill þakka fyrir samúð og stuðning ykkar allra og getur ekki beðið eftir að dela kvikmyndinni með ykkur næsta sumar,“ sagði framleiðandi kvikmyndarinnar, Paramount Pictures, í tilkynningu en ekki er ljóst hversu lengi tökur munu tefjast.