Hillary Clinton vill predika í kirkju

Prestur Hillary Clinton, Bill Shillady, sagði í samtali við People að hún væri áköf að reyna að koma jafnvægi á Bandaríkin aftur og íhugar nú að predika í kirkju.

Shillady var andlegur og trúarlegur ráðgjafi Clinton í gegnum forseta framboð hennar í fyrra þar sem hann sendi henni bæn í tölvupósti á hverjum degi. Bænirnar sem hann sendi henni hafa nú verið settar saman í bók sem kemur út í þessari viku.

Þegar Clinton og Shillady voru saman stödd í myndatöku fyrir bókina sagðist hún hafa áhuga á því að predika í kirkju prestsins sem er kirkja meþódista. Sú kirkja, samkvæmt honum, hefur oft leyft gestum að predika.

„Ég held að hún viti rosalega mikið um Biblíuna,“ segir hann og bætir við að Clinton hafi fundið styrk og hughreystingu í trú sinni eftir að hún tapaði fyrir Trump í forsetakosningunum.

Clinton hefur aðallega lagt áherslu á samheldni Bandaríkjamanna upp á síðkastið innan um mikla umræðu um hatur og umburðarleysi og myndi predikun hennar eflaust hvetja landsmenn hennar til þess að sýna samstöðu. 

• Blogga um frétt