Ekki löngu seinna bauð Weinstein henni að horfa á mynd heima hjá sér, hann sendi bíl að sækja Nyong'o. Þegar Nyong'o var komin í bílinn sagði bílstjórinn henni að hún ætti fyrst að borða hádegismat með framleiðandanum. Þegar hún bað um djús í stað áfengis á veitingastaðnum brást Weinstein illa við og pantaði vodka fyrir hana. Rifust þau um þetta.
Þau fóru síðan heim til hans þar sem hún hitti meðal annars börn hans. Eftir 15 mínútur af kvikmyndinni kom Weinstein og sótti hana þar sem hann vildi sýna henni svolítið. Nyong'o vildi klára myndina en Weinstein krafðist þess að hún kæmi með sér. Weinstein fór með hana inn í svefnherbergi og vildi nudda hana. Nyong'o fylltist hræðslu og bauðst til að nudda hann þar sem þá væri hún við stjórnvölinn. Hann vildi þá fara úr buxunum, Nyong’o var ekki hrifin af því en hann gerði það samt og við það fór leikkonan.
Seinna hitti Nyong'o hann á veitingastað og áður en forrétturinn kom sagði Weinstein henni að hann ætti bókað herbergi uppi og bað hana um að klára að borða þar. Nyong'o neitaði en Weinstein sagði að ef hún ætlaði að verða leikkona þyrfti hún að gera svoleiðis hluti. Eftir að Nyong'o fullvissaði hann um að hún ætlaði ekki með honum upp á herbergi sagði hann henni að hún gæti farið, þetta væri búið.