Frans páfi fagnaði í dag 81 árs afmæli sínu með köku skreyttri mynd af honum sjálfum. Hvatti páfi íbúa jarðar og ekki síst börnin til að finna fyrir jólaandanum og gleðjast.
Páfi þakkaði þeim sem komið höfðu saman á Sankti Péturstorginu í Róm eftir að mannfjöldinn hafði sungið afmælissönginn fyrir hann að loknu bænahaldi. Því næst skar páfi afmælistertu sína sem skreytt er mynd af honum sjálfum með heiminn á herðum sér.
Það er ítalski graffitílistamaðurinn MauPal sem á heiðurinn af kökuskreytingunni, en þetta er ekki í fyrsta skipti sem MauPal velur sér páfa sem myndefni. Árið 2014 gerði hann mynd af Frans páfa í gervi Súpermanns og prýðir sú mynd í dag stuttermaboli sem seldir eru til styrkar ýmsum góðgerðarfélögum Vatíkansins.
„Verið alltaf glöð, líka þegar hlutirnir fara ekki eins og maður vildi að þeir gerðu,“ sagði páfi. Áður hafði hann ítrekað mikilvægi þess að skýla börnum fyrir hremmingum hinna fullorðnu.
„Þegar börn sjá vandamál heima, foreldra sem rífast, þá líða þau fyrir það. Ekki gera þau sorgmædd, þau eiga alltaf að vaxa úr grasi við gleði,“ sagði páfi sem skar afmælistertuna með hópi barna sem njóta stuðnings stofnana Vatíkansins.