Stuðlar alþjóðlegra veðbanka á íslenskan sigur í lokakeppni Eurovision 2019 hafa hækkað síðan á laugardagskvöld, þegar þeir voru lágir eftir sigur Hatara í Söngvakeppni Sjónvarpsins.
Vefsíðan Eurovision World tekur saman stuðla í Eurovision frá fjölda veðbanka en samkvæmt reikniformúlu þeirra myndi íslenska atriðið hafna í 6. sæti í Tel Aviv í maí. Íslandi var spáð 4. sæti á laugardagskvöldið.
Enn eiga nokkur lönd eftir að tilkynna þátttakendur sína í keppninni. Þar á meðal er Svíþjóð en Svíum er þrátt fyrir það spáð 3. sæti. Rússum er líkt og áður spáð sigri en Sergey Lazarev fer fyrir þeirra hönd til Tel Aviv. Ekki hefur verið ákveðið hvaða lag hann flytur.
Reikniformúla Eurovision World gefur einnig út hversu miklar líkur eru taldar á sigri hvers lands. Rússar, sem eru sigurstranglegastir, eru sagðir eiga 17% líkur á sigri en 5% líkur eru á sigri Hatara.