Aukabörnin kolefnisjöfnuð

Hjón, sem eiga meira en tvö börn, ættu að borga sérstakt kolefnisgjald til að bæta fyrir mengunina, sem barnið eða börnin umfram þau fyrstu tvö koma til með að valda. Er það tillaga ástralsks læknis og prófessors.

Í grein eftir Barry Walters í ástralska læknatímaritinu segir hann að með hverju „aukabarni“ ættu foreldrarnir að greiða í eitt skipti um 270.000 ísl. kr. og síðan 50.000 kr. á ári eftir það. Féð ætti að nota til að planta út trjám sem bættu fyrir áætlaða mengun. Var grein Walters öðrum þræði svar eða gagnrýni á „barnabónusinn“, sem áströlsk yfirvöld greiða með hverjum nýbura.

Í Ástralíu hafa ýmsir orðið til að taka undir með Walters og segja þeir að fólksfjölgunin verði að skipa miklu stærri sess í umræðunni um umhverfismál.