62 ára maður í Ohio-ríki í Bandaríkjunum sat í gær á fjölfarinni gangstétt í bænum South Euclid með skilti þar sem stóð á: „Ég er hrotti.“ Var viðurkenningin hluti af refsingu sem hann hlaut fyrir að hafa valdið nágrönnum sínum, þar á meðal fötluðum dreng, kerfisbundnum óþægindum með hrekkjum og truflunum, í 15 ár.
Maðurinn hafði staðið í deilum við nágranna sína í fimmtán ár þegar hann var dæmdur. Nágranni hans á tvo ættleidda drengi sem báðir glíma við líkamlegar og andlega fatlanir. Maðurinn hafði yfir lengri tíma nítt fjölskylduna bæði með fúkyrðum og með ýmis konar ofbeldi. Í eitt skipti hélt hann einum drengjanna niðri á meðan hann hrækti á hann.
Dómarinn í málinu sendi manninn í 15 daga fangelsi og á reiðistjórnunarnámskeið. Þá þurfti hann, eins og sést á myndinni að viðurkenna opinberlega að hann sé hrotti sem níðist á yngri börnum sem geti ekki varið sig og að hann umberi ekki fólk sem sé öðruvísi en hann sjálfur. Neðst á spjaldinu segir að skoðanir hans endurspegli ekki fjölmenningarsamfélagið sem hann sé hluti af í bænum South Euclid.