Bílþjónn á fimm stjörnu hóteli varð fyrir því óhappi að missa stjórn á Lamborghini Gallardo bifreið sem hann var að leggja í stæði með þeim afleiðingum að hann ók bifreiðinni á vegg. Skemmdirnar á bílnum eru metnar á 335 þúsund Bandaríkjadali, 38,3 milljónir króna.
Dagblaðið Times of India birtir í dag mynd af Lamborghini Gallardo bifreiðinni þar sem skemmdirnar sjást greinilega. Talsmaður Le Meridien hótelsins segir að um óhapp hafi verið að ræða. Sá sem ók bifreiðinni hefur starfað sem bílþjónn í tíu ár og svo virðist sem hann hafi misst stjórn á bifreiðinni en talsverð bleyta var þegar óhappið varð á bílastæði hótelsins.