Ógnandi trúðar hafa valdið skelfingu meðal íbúa í bæjum í Frakklandi um helgina. Trúðarnir voru vopnaðir byssum, hnífum og hafnaboltakylfum. Lögregla handtók í gær 14 ungmenni sem stóðu fyrir uppákomunni.
Lögreglu bárust margar tilkynningar frá íbúum sem höfðu rekist á vopnaða trúða sem þeim stóð ógn af. Um var að ræða nemendur í skóla í bænum Agde í Frakklandi sem voru að gera sér glaðan dag með þessum sérkennilega hætti.
Ógnandi trúðar eru reyndar ekki bundnir við Frakkland. Í þessum mánuði hafa lögreglu í Bandaríkjunum og Bretlandi borist tilkynningar um vopnaða trúða sem hafi ógnað vegfarendum.