Sprengjumaður hengdur fyrir allra augum í Íran

Írönsk yfirvöld hafa hengt mann opinberlega vegna sprengjuárásar sem varð 11 liðsmönnum úr íranska Byltingarverðinum að bana í síðustu viku. Nasrollah Shanbe Zehi var hengdur fyrir augum almennings á sama stað og árásin var gerð í borginni Zahedan í suðausturhluta landsins.

Sýnt var í sjónvarpi þegar Zehi viðurkenndi að hafa framið verknaðinn sl. miðvikudag og það var dómstóll í Zahedan sem dæmdi í máli hans, segir á fréttavef BBC.

Árásin átti sér stað þegar bifreið, sem var full af sprengiefni, stöðvaði við hlið rútu sem flutti hermenn til og frá vinnu. Uppreisnarhópurinn Jundallah lýsti verknaðinum á hendur sér.

Hópur fólks hrópaði „Deyi Ameríka“ og „Deyi Ísrael“ á meðan það fylgdist með aftökunni. Sem fyrr segir var Zehi tekinn af lífi á sama stað og árásin var gerð, en að sögn fréttaskýrenda er algengt að glæpamenn séu líflátnir á þeim stöðum þar sem þeir frömdu glæpinn.

Aftakan var tekin upp á myndband og sýnd í íranska ríkissjónvarpinu.

• 3 blogg um fréttina

Bloggað um fréttina

• Snorri Bergz: Henging
• Níels A. Ársælsson.: Grimmúðlegt !
• G. Tómas Gunnarsson: Engin fyrirsögn, ekkert "sándbæt"