2.200% verðbólga í Zimbabwe

Verðbólgan í Zimbabwe mældist 2.200% í mars, og er sú mesta sem mælist í nokkru ríki í heiminum. Birta átti þessar tölur fyrr í mánuðinum, en birtingu þeirra var seinkað, að því er BBC greinir frá. Að minnsta kosti 80% íbúa landsins búa undir fátæktarmörkum, samkvæmt tölum frá samtökum stéttarfélaga í landinu.

Bankastjóri seðlabankans í Zimbabwe, Gideon Gono, sagði að gengi gjaldmiðilsins, Zimbabwe-dollarans, yrði áfram 250 á móti 1 Bandaríkjadollar. Aftur á móti yrði það 15.000 fyrir suma útflytjendur, alþjóðasamtök, gullgrafara, tóbaksbændur og ýmsa fleiri.

Fréttaskýrendur segja að þetta jafngildi í raun 60 faldri gengisfellingu, en því hafnar Gono. Fréttaskýrendur segja hann vera að reyna að fá aukið erlent fjármagn inn í opinbera hagkerfið, í stað þess að það fari á svarta markaðinn, þar sem Bandaríkjadollarinn kostar 25.000 Zimbabwedollara.

Forseti landsins, Robert Mugabe, segir að efnahagserfiðleikarnir séu sök vestrænna ríkja sem vilji steypa sér af stóli.

• 1 blogg um fréttina

Bloggað um fréttina

• Jón Þór Bjarnason: Við heppin...