Myndbönd sýna börn bera vopn

Bandaríkja- og Íraksher hafa birt myndbönd sem þeir segja sýni börn undir 11 ára aldri bera vopn og hljóta þjálfun al-Qaeda liða. Bandaríkjaher segist hafa fundið fimm myndbönd þegar her bandamanna gerði áhlaup á felustaði meintra al-Qaeda liða norður af Bagdad í desember.

Fram kemur á fréttavef BBC að á myndböndunum sjást ungir drengir halda á byssum og handsprengjum á al-Qaeda æfingu.

Að sögn fréttaskýrenda vonast Bandaríkjamenn til að myndböndin verði til þess að sannfæra Íraka um að snúast gegn hryðjuverkasamtökunum.

Í einu atriði sjást ungir drengir æfa mannrán. Þeir neyða sjálfboðaliða til að fara á hnén og miða byssu á höfuðið á honum.