Erlent | AFP | 29.2.2008 | 9:49 | Uppfært 13:47

Bandaríkja- og Kínaher koma á beinu símasambandi

Kínverskur hermaður sést hér stökkva yfir hindrun eins og ekkert sé. AP

Bandaríkin og Kína og undirrituðu í dag samkomulag um að setja á laggirnar beint símasamband milli herja landanna. Frá þessu greindi embættismaður í bandaríska varnarmálaráðuneytinu í dag.

Samningurinn var undirritaður í Sjanghæ í Kína. Þá gerðu þjóðirnar jafnframt með sér samkomulag um að veita stjórnvöldum í Washington að skjalasafni kínverska hersins, svo Bandaríkin geti leitað að hermönnum sem hafa týnst í stríði.

Hugmyndin um beint símasamband (e. hotline) milli herjanna skaut fyrst upp kollinum í Bandaríkjunum árið 2003. Þjóðirnar komust að munnlegu samkomulagi um þetta í fyrra þegar Robert Gates, varnarmálaráðherra Bandaríkjanna, heimsótti Peking.