Handtöku Karadzic víða fagnað

Saksóknarar við stríðsglæpadómstólinn í Haag hafa fagnað handtöku Radovan Karadzic, fyrrum leiðtoga Bosníu Serba og eftirlýsts stríðsglæpamanns. Þeir segja handtökuna marka tímamót.

Karazic hefur verið færður fyrir stríðsglæpadómstólinn í Belgrad. Að sögn serbnesku forsetaskrifstofunnar þýðir það að hann verður brátt framseldur.

Embættismenn hafa ekki gefið nákvæmar upplýsingar um handtöku hans, en það verður gert eftir að saksóknarar, lögreglan og leyniþjónustumenn hittast í Belgrad til að fara yfir málið í dag

Boris Tadic, forseti Serbíu, greindi frá því að serbenskir leyniþjónustumenn hafi handtekið Karadzic í gærkvöld. Karadzic hefur verið eftirlýstur í meira en áratug.

Heimildarmenn innan serbnesku ríkisstjórnarinnar sögðu við Reuters-fréttastofuna að Karadzic hafi verið undir eftirliti í nokkrar vikur eftir ábendingu frá erlendri leyniþjónustu.

Þungvopnaðir sérsveitarmenn voru staðsettir fyrir utan stríðsglæpadómstólinn í Belgrad þegar Karadzic var fluttur þangað vegna ótta við viðbrögð þjóðernissinna, sem líta á Karadzic sem hetju.

Víða var handtökunni fagnað, en hér sjást íbúar í Sarajevo veifa fánum eftir að fréttir af handtökunni bárust í gærkvöldi. Reuters

Radovan Karadzic (t.h.) sést hér ásamt hershöfðingjanum Ratko Mladic árið 1995. Reuters

• 1 blogg um fréttina

Bloggað um fréttina

• Hallur Magnússon: Mikilvægt skref í átt til ESB aðildar Serba!