Martti Ahtisaari, fyrrverandi forseti Finnlands, hlaut í dag friðarverðlaun Nóbels fyrir mikilvægt starf hans í yfir þrjá áratugi og í nokkrum heimsálfum til að leysa alþjóðlegar deilur.
Ahtisaari, sem er 71 árs, starfaði fyrst sem grunnskólakennari en hóf síðan störf hjá finnska utanríkisráðuneytinu árið 1965. Hann var í 20 ár í utanríkisþjónustunni og var fyrst sendiherra Finnlands í Tansaníu og síðan hjá Sameinuðu þjóðunum í New York.
Ahtisaari starfaði hjá SÞ í fjögur ár en hélt heim 1991 og var ráðuneytisstjóri finnska utanríkisráðuneytisins til 1994 þegar hann var kjörinn forseti landsins og því embætti gegndi hann í eitt sex ára kjörtímabil en gaf ekki kost á sér til endurkjörs. Hann hafnaði einnig tilboðum um alþjóðleg embætti en opnaði þess í stað eigin skrifstofu í Helsinki.
Ahtisaari kom fyrst að lausn alþjóðlegra deilumála þegar hann var formaður starfshóps um Bosníu-Herzegovínu á friðarráðstefnu um Balkanríkin á árunum 1992-1993. Hann var einnig árið 2005 skipaður sérstakur erindreki SÞ í viðræðum um framtíð Kosovo.Hann hefur einnig komið að því að leysa deilur milli uppreisnarmanna stjórnvalda í Aceh-héraði í Indónesíu en árið 2005 tókst að binda enda á þriggja áratuga borgarastyrjöld þar.
Á síðasta ári hafði skrifstofa Ahtisaaris milligöngu um leynilegar viðræður milli súnní- og sjía-múslima um frið.