Ummæli kardínála vekja reiði

Baráttufólk fyrir réttindum samkynhneigðra hafa harðlega gagnrýnt tilraunir Tarcisio Bertone, kardínála í Páfagarði, til þess að tengja saman samkynhneigð og barnaníð. Kardínálinn lét í opinberri heimsókn sinni til Chile hafa eftir sér að samkynhneigð en ekki skírlífi væri orsök barnaníðs.

Bertone sagðist hafa gögn frá fjölda sálfræðinga sem sýndu fram á að engin tengsl væru milli skírlífis og barnaníðs. „En hins vegar hafa aðrir, eftir því sem mér skilst, sýnt fram á tengsl samkynhneigðar og barnaníðs. Það er satt. Ég hef gögn frá sálfræðingum sem sýna það.“

Patricio Walker, öldungaþingmaður í Chile, segist gjarnan vilja fá að sjá þau gögn sem kardínálinn vísar til þar sem hann telur kardínálann hafa rangt fyrir sér.

„Skírlífi veldur mannfólki meiri skaða en samkynhneigð, þar sem um frjálst val er að ræða. Ég er hneykslaður á orðum þessa hátt setta manns innan kirkjunnar,“ segir Hugo Gutierrez, þingmaður í Chile.

Gaylib, Enrico Oliari, formaður baráttuhóps samkynhneigðra í Róm, segist hafa áhyggjur af því talsmaður Páfagarðs á erlendum vettvangi skuli grípa til röksemda sem þykja ekki einu sinni gjaldgengar í þriðja heiminum.

„Sannleikurinn er sá að Bertone er með klaufalegum hætti að reyna að beina athyglinni að samkynhneigðum og samtímis frá nýjum fréttum af glæpum gegn börnum sem berast daglega,“ segir Aurelio Mancuso, fyrrverandi forseti Arcigay baráttusamtaka samkynhneigðra á Ítalíu.

Á sama tíma berast fréttir af því að Frakkar hafi fordæmt ummæli Bertones.
Að sögn Bernard Valero, utanríkisráðherra Frakklands, er óásættanlegt að tengja saman samkynhneigð og barnaníð. Sagðist hann fordæma ummæli Bertones. 

• 2 blogg um fréttina

Bloggað um fréttina

• Baldur Sigurðarson: Er ekki bara kominn tími til að skoða þetta nánar?
• Reputo: Ánægður með Bertone