Drottningin heimsækir Filippus í dag

Filippus prins, eiginmaður Elísabetar drottningar, átti góða nótt á sjúkrahúsi eftir að hafa gengist undir hjartaaðgerð í gær. Fjölskylda hans mun heimsækja hann í dag, að sögn talsmanns bresku konungsfjölskyldunnar.

Filippus var níræður fyrr á þessu ári. Hann fann fyrir verk fyrir brjósti í gær og var fluttur með þyrlu á sjúkrahús. Í ljós kom að hann er með þrengingu í kransæð og var neti komið fyrir í æðinni sem greiðir fyrir blóðflæði.

Filippus hefur verið heilsuhraustur fram að þessu og ekkert hefur komið fram um að hann hafi átt við kransæðasjúkdóm að stríða.

• Blogga um frétt