Óttast að eitrað hafi verið fyrir skólastúlkum

Yfir eitt hundrað afganskar skólastúlkur voru fluttar á sjúkrahús í dag eftir að þær drukku vatn sem talið er að hafi verið eitrað. Er jafnvel talið að andstæðingar þess að stúlkur gangi í skóla hafi eitrað vatnið.

Stúlkurnar veiktust eftir að hafa drukkið vatn úr vatnsdunk í menntaskólanum í bænum Rustaq í norðausturhluta Takhar-héraðs.

Talsmaður menntamálaráðuneytisins, Abdul Saboor, varar hins vegar við því að draga strax ályktanir um að eitrað hafi verið fyrir stúlkunum. Þær hafi ekki veikst alvarlega og einhverjar útskrifaðar fljótlega af sjúkrahúsinu. Hins vegar liggi enn einhverjar á sjúkrahúsi. Unnið sé að rannsókn málsins.

Afgönskum stúlkum var bannað að ganga í skóla og vinna fyrir sér á skrifstofum á meðan talibanar voru við völd í Afganistan. Þetta breyttist í kjölfar innrásar Bandaríkjamanna inn í landið seint á árinu 2001. Milljónir afganskra stúlka gengur nú í skóla en ítrekað er ráðist á þær og kennara þeirra af stuðningsmönnum talibana.

• Blogga um frétt