Hafa hlerað síma Merkel í 11 ár

Bandarísk yfirvöld hafa hlerað farsíma Angelu Merkel, kanslara Þýskalands, frá árinu 2002. Þýska vikublaðið Der Spiegel greinir frá þessu.

Blaðið segist hafa séð leyniskjöl frá Þjóðaröryggisstofnun Bandaríkjanna (NSA) þar sem sjá má símanúmer Merkels allt aftur til ársins 2002, þ.e. áður en hún varð kanslari Þýskalands. 

Númerið var enn á lista NSA fyrir þetta ár.

Í Bandaríkjunum hafa margir komið saman til að mótmæla njósnum NSA, að því er segir á vef BBC. Þúsundir komu saman í Washington, höfuðborg Bandaríkjanna, og gekk fólkið fylktu liði að bandaríska þinghúsinu og krafðist þess að eftirlitinu verði takmörk sett. Sumir héldu á spjöldum þar sem lýst var yfir stuðningi við bandaríska uppljóstrarann Edward Snowden, sem hefur átt stóran þátt í að upplýsa almenning um starfsemi NSA. 

Der Spiegel segir að ekki sé hægt að sjá í skjölunum hvernig eftirlitinu með síma Merkels var háttað. Menn spyrja hvort símtölin hafi verið tekin upp eða hvort mat hafi verið lagt á tengiliði hennar. 

Æðstu yfirmenn þýsku leyniþjónustunnar munu fara til Washington í næstu viku til að ræða málið við þarlend yfirvöld, en málið hefur vakið mikla reiði í Þýskalandi.

• 3 blogg um fréttina

Bloggað um fréttina

• Axel Jóhann Axelsson: Viðvörunarbúnað í alla síma
• Leifur Þorsteinsson: Gamli sveitasíminn
• Wilhelm Emilsson: Því miður