Tólf ung börn særðust, þar af tvö alvarlega, þegar sprengja sprakk á leikvelli við leikskóla í borginni Benghazi í Líbíu í dag. Vitni segja að sprengjunni hafi verið kastað yfir girðingu leikvallarins á meðan börnin voru þar að leik.
Róstusamt hefur verið í borginni að undanförnu, sem er önnur stærsta borg landsins, en syni yfirmanns sérsveitar lögreglu var rænt í síðustu viku og er þess krafist að fangar verði látnir lausir í skiptum fyrir hann.
Nánast daglega hefur verið ráðist að stjórnarbyggingum og öðrum opinberum mannvirkjum þar og stjórnvöldum gengur illa að koma böndum á ástandið. Síðastliðna nótt réðust byssumenn á liðsmenn sérsveitar lögreglu í miðborg Benghazi og réðust að því búnu á hóp stjórnarandstæðinga sem höfðu komið sér fyrir í miðborginni til mótmæla og kveiktu í tjöldum þeirra og bílum.
Enginn hefur lýst yfir ábyrgð á sprengingunni í dag.