Erlent | mbl | 11.4.2014 | 21:02 | Uppfært 12.4.2014 7:46

Svanir ráðast á erlenda nemendur

Mynd úr safni. mbl.is/Eyþór

Warwick háskólinn á Englandi hefur sett upp girðingu í kringum stöðuvatn á lóð skólans til að koma í veg fyrir frekari árásir svana á nemendur, þá sér í lagi af erlendum uppruna.

Svanirnir hafa verið sakaðir um að ráðast með harkalegum hætti á erlenda nemendur skólans þegar þeir ganga yfir brú hjá vatninu, í nánd við dvalarstað svananna.

Hundruðir nemenda skólans nota brúna á hverjum degi en nokkrir þeirra komust fljótlega að því að svo virtist sem svanirnir réðust eingöngu á nemendur af erlendum uppruna.

„Svanirnir eru mjög pirrandi og nemendunum líður eins og verið sé að leggja þá í einelti,“ segir einn indverskur nemandi skólans við The Telegraph. „Ég er frá Indlandi og þeir ráðist sérstaklega á mig. Þeir einbeita sér að mér,“ bætir hann við.

„Ég held að þeir vilji ekki hafa of marga Indverja í Englandi, kannski eru svanirnir hér rasistar.“

„Þetta er skrítið. Svo virðist sem þeim geðjist ekki að útlendingum og ráðist á þá til að verja hreiðrin sín,“ segir hin ítalska Albertina Crocetti.