Hollande boðar skattalækkanir

Francois Hollande, forseti Frakklands, segir að áframhaldandi efnahagsbati í landinu muni skapa svigrúm til skattalækkana í náinni framtíð. 

Hann telur þó að batinn sé sem stendur ekki nægilega sterkur, heldur enn of brothættur. En með áformum ríkisstjórnar hans í efnahagsmálum muni hagvöxtur loks fara að taka við sér og atvinnuleysi minnka.

Þetta sagði hann í samtali við franska fjölmiðla í dag.

Ummæli forsetans hafa vakið þónokkra athygli enda hefur hann hingað til verið þekktur fyrir sósíalískar skoðanir sínar. Hafði hann til dæmis stór áform um að hækka verulega skatta á franska auðmenn, að því er segir í frétt Reuters.

Í maímánuði árið 2012 var Hollande kjörinn forseti Frakklands til fimm ára. Hann segir að þegar honum tekst loks að koma böndum á ríkisfjármálin, þá sé mögulegt að huga að því að lækka skatta á franskan almenning.

• 1 blogg um fréttina

Bloggað um fréttina

• Geir Ágústsson: Skattalækkanir eru undanfari efnahagsbata