Sólríkur og hlýr septembermánuður hefur heldur betur kætt franska vínframleiðendur og í Bordeaux héraði vonast framleiðendur eftir góðri uppskeru í ár þrátt fyrir vætusamt sumar.
Ekki er hægt að segja til um það strax hvort uppskeran verði einstök enda er bara byrjað að tína merlot þrúgur á meðan cabernet þrúgurnar eru ekki tíndar fyrr en undir lok október.
Í ágúst voru vínbændur orðnir ansi þungbúnir í Bordeaux enda var júlí óvenjukaldur og ágúst votur. En þegar september loks leit dagsins ljós fór brúnin heldur betur að léttast enda mánuðurinn bæði óvenjuhlýr og sólríkur.